ກົມກວດກາ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມເຜີຍແຜ່ນິຕິກໍາ ເອກະສານແຈ້ງຊັບສິນ ແລະ ລາຍຮັບ ໃຫ້​ພະນັກງານ-ລັດຖະກອນ ແລະ ພະນັກງານຂອງບໍລິສັດ ທີ່ໄດ້ເລື່ອນຕໍາແໜ່ງ, ພັກຜ່ອນຮັບບໍານານ ຂອງບັນ​ດ​າ​ກົມຫຼື ທຽມ​ເທົ່າ ແລະ ບັນ​ດາບໍ​ລິ​ສັດ​ ທີ່ຂື້ນກັບການຄຸ້ມຄອງຂອງກະ​ຊວງເຕັກໂນໂລຊີ ແລະ ການສື່ສານ ໃນຕອນເຊົ້າຂອງວັນທີ 05 ພະຈິກ 2024, ທີ່ຫ້ອງປະຊຸມຊັ້ນ 02 ສູນອິນເຕີເນັດແຫ່ງຊາດ, ໂດຍການ ເປັນປະທານຂອງ ທ່ານ ເຮີເຊັງ ເຢຍປໍເຮີ, ກຳມະການຄະນະພັກກະຊວງ, ຮອງປະທານຄະນະກວດກາພັກກະຊວງ, ຫົວໜ້າກົມກວດກາ ກະຊວງເຕັກໂນໂລຊີ ແລະ ການສື່ສານ, ມີຄະນະໜ່ວຍພັກກົມ ແລະ ທຽບເທົ່າອ້ອມຂ້າງກະຊວງ, ຄະນະອໍານວຍການ ບັນດາບໍລິສັດທີ່ຂຶ້ນກັບກະຊວງ, ປະທານກວດກາບັນດາໜ່ວຍພັກ-ຮາກຖານພັກ, ຜູ້ເຮັດວຽກງານກວດກາ ແລະ ຄະນະຮັບຜິດຊອບ ເຂົ້າຮ່ວມຈໍານວນທັງໝົດ 50 ທ່ານ/ຍິງ 18 ທ່ານ.

ກອງປະຊຸມຄັ້ງນີ້, ທ່ານ ນາງ ສຸດາວັນ ດວງມະນີວົງ, ຫົວໜ້າພະແນກຕ້ານການສໍ້ລາດບັງຫຼວງ ແລະ ສືບສວນ-ສອບສວນ ໄດ້ຜ່ານຂໍ້ຕົກລົງ ຂອງລັດຖະມົນຕີ ວ່າດ້ວຍການອະນຸມັດຈັດກອງປະຊຸມເຜີຍແຜ່ ແລະ ດໍາເນີນການແຈ້ງຊັບສິນ ແລະ ລາຍຮັບ ສະບັບເລກທີ 4051/ກຕສ, ລົງວັນທີ 27 ກັນຍາ 2024. ຊຶ່ງຈຸດປະສົງຂອງການຈັດກອງປະຊຸມ ແມ່ນເພື່ອ​ຈັດຕັ້ງປະຕິບັດການເຜີຍແຜ່ບົດແນະນຳ ຂອງອົງການກວດກາລັດຖະບານ ສະບັບເລກທີ 46/ອກລ, ລົງວັນທີ 20 ກຸມພາ 2017 ແລະ ມອບແບບຟອມ ເອກະສານແຈ້ງ​ຊັບ​ສິນ ແລະ ລາຍ​ຮັບ ໃຫ້​ແກ່​ພະນັກງານ-ລັດຖະກອນ ທີ່ຮັບການເລື່ອນຕຳແໜ່ງ,​ ຜູ້ຈະອອກພັກຜ່ອນຮັບເບ້ຍບຳນານ (ໃນໄລຍະ ແຕ່ເດືອນ 11 ປີ 2022 ຫາ ເດືອນ 09 ປີ 2024), ຜູ້ທີ່ບໍ່ທັນໄດ້ແຈ້ງຊັບສິນ ແລະ ລາຍຮັບ ເພື່ອ​ດໍາ​ເນີນ​ການ​ແຈ້ງ​ຊັບ​ສິນ ແລະ ລາຍຮັບ ​ໃນ​ຄັ້ງນີ້ ໃຫ້​ປະສົບ​ຜົນ​ສໍາ​ເລັດຕາມ​ລະດັບ​ຄາດໝາຍ.

ໃນໂອກາດດັ່ງກ່າວນີ້, ທ່ານ ປະທານກອງປະຊຸມ ກໍໄດ້ໃຫ້ກຽດເຜີຍແຜ່ດໍາລັດ ວ່າດ້ວຍການແຈ້ງຊັບສິນ ສະບັບເລກທີ 159/ລບ, ລົງວັນທີ 04 ມີຖຸນາ 2013. ນອກນີ້, ບັນດາທ່ານທີ່ເຂົ້າຮ່ວມກອງປະຊຸມ ຍັງໄດ້ຮັບຟັງບົດແນະນຳ ຂອງອົງການກວດກາລັດຖະບານ ກ່ຽວກັບການຈັດຕັ້ງປະຕິບັດດໍາລັດ ວ່າດ້ວຍການແຈ້ງຊັບສິນ (ສະບັບປັບປຸງ) ສະບັບເລກທີ 46/ອກລ, ລົງວັນທີ 20 ກຸມພາ 2017 ນໍາສະເໜີໂດຍ ທ່ານ ຄຳໄມ ແພງວົງສາ, ຮອງຫົວໜ້າກົມກວດກາ ແລະ ແນະນໍາເຜີຍແຜ່ຮ່າງການຂຽນແບບຟອມເອກະສານແຈ້ງ​ຊັບ​ສິນ ແລະ ລາຍ​ຮັບ ໂດຍທ່ານນາງ ສຸດາວັນ ດວງມະນີວົງ, ຫົວໜ້າພະແນກຕ້ານການສໍ້ລາດບັງຫຼວງ ແລະ ສືບສວນ-ສອບສວນ.

ໃນຕອນທ້າຍ, ທ່ານ ຄຳໄມ ແພງວົງສາ, ຮອງຫົວໜ້າກົມກວດກາ ຍັງໄດ້ສະແດງຄວາມຂອບໃຈມາຍັງບັນດາຜູ້ເຂົ້າຮ່ວມກອງປະຊຸມ ແລະ ກ່າວປິດກອງປະຊຸມຢ່າງເປັນທາງການໃນເວລາ 11:30 ໂມງ ຂອງວັນດຽວກັນ.

ຂ່າວສານ: ພຸດທະສັກ ບຸນສຸດທະວີ