ໃນຕອນເຊົ້າຂອງວັນທີ 07 ພະຈິກ 2024, ທີ່ຫ້ອງຮັບແຂກຂອງ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ໂມຮາມັດ ອາດລັນ ອາມາດ ຕາຈູດິນ (MOHAMED ADLAN AHMAD TAJUDIN), ຜູ້ອຳນວຍການໃຫຍ່ ກຸ່ມບໍລິສັດ ອີດັອດໂກ ພ້ອມດ້ວຍຄະນະ.

ໂອກາດນີ້, ທ່ານ ຜູ້ອຳນວຍການໃຫຍ່ ກຸ່ມບໍລິສັດ ອີດັອດໂກ ໄດ້ກ່າວສະແດງຄວາມຂອບໃຈຕໍ່ທ່ານລັດຖະມົນຕີ ກຕສ ທີ່ໄດ້ເສຍສະຫຼະເວລາອັນມີຄ່າຕ້ອນຮັບຢ່າງອົບອຸ່ນ, ພ້ອມທັງສະເໜີລາຍງານໃຫ້ຊາບວ່າ: ກຸ່ມບໍລິສັດ ອີດັອດໂກ ເປັນຜູ້ນໍາທາງດ້ານການໃຫ້ບໍລິການພື້ນຖານໂຄງລ່າງດ້ານໂທລະຄົມມະນາຄົມແບບດິຈິຕອນແກ່ບັນດາເຄືອຂ່າຍໂທລະຄົມມະນາຄົມໃນກຸ່ມອຸດສາຫະກໍາໂທລະຄົມມະນາຄົມ, ບໍລິສັດໄດ້ມາສ້າງຕັ້ງ ແລະ ດໍາເນີນທຸລະກິດໃນປະເທດລາວນັບແຕ່ປີ 2019 ໃນຊື່ ບໍລິສັດ ອີດັອດໂກລາວ ຈໍາກັດ ແລະ ປັດຈຸບັນໄດ້ໃຫ້ບໍລິການໃຫ້ເຊົ່າສະຖານີເສົາສັນຍານໂທລະຄົມ ຈຳນວນ 14 ສະຖານີໃຫ້ແກ່ບັນດາຜູ້ໃຫ້ບໍລິການດ້ານໂທລະຄົມມະນາຄົມໃນ ສປປ ລາວ. ການເຂົ້າພົບຄັ້ງນີ້ ກໍເພື່ອປຶກສາຫາລື ແລະ ຂໍຄຳເຫັນກ່ຽວກັບດ້ານຕ່າງໆຂອງການພັດທະນາເສດຖະກິດລາວ, ລວມທັງແຜນພັດທະນາ, ນະໂຍບາຍ ແລະ ສະພາບການໃນອະນາຄົດຂອງອຸດສາຫະກຳໂທລະຄົມມະນາຄົມໃນລາວ.

ພ້ອມດຽວກັນ, ທ່ານ ລັດຖະມົນຕີ ກໍໄດ້ກ່າວສະແດງຄວາມຍິນດີຕ້ອນຮັບ ແລະ ຂອບໃຈຕໍ່ການເຂົ້າຢ້ຽມຂ່ຳນັບຂອງ ຜູ້ອໍານວຍການໃຫຍ່ ກຸ່ມບໍລິສັດ ອີດັອດໂກ ພ້ອມດ້ວຍຄະນະ ພ້ອມທັງແຈ້ງໃຫ້ຊາບສະພາບການໂດຍລວມທາງດ້ານວຽກງານໂທລະຄົມມະນາຄົມຂອງ ສປປ ລາວ. ທ່ານຍັງໄດ້ສະແດງຄວາມຍິນດີໃຫ້ການສະໜັບສະໜູນບໍລິສັດ ໃນການສ້າງພື້ນຖານໂຄງລ່າງດ້ານໂທລະຄົມມະນາຄົມຢູ່ ສປປ ລາວ ແລະ ພ້ອມໃຫ້ການຮ່ວມມື ໂດຍປະສານສົມທົບກັບ ອົງການດັດສົມໂທລະຄົມມະນາຄົມ ເພື່ອນໍາເນີນວຽກງານດັ່ງກ່າວ.

ພາບ ແລະ ຂ່າວ: ພຸດດາວອນ ພາສຸວັນ