ໃນໂອກາດທີ່ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ (ກຕສ) ພ້ອມດ້ວຍຄະນະລົງເຄື່ອນໄຫວຊຸກຍູ້ວຽກງານຢູ່ແຂວງ ຄໍາມ່ວນ, ໃນວັນທີ 27 ພະຈິກ 2024 ຍັງໄດ້ເຄື່ອນໄຫວຢ້ຽມຢາມ ບໍລິສັດ ຊີໂນ-ອາກຣີ ໂປຕາສ ຈໍາກັດ ທີ່ບ້ານດົງໃຕ້, ເມືອງ ທ່າແຂກ ໂດຍມີ ທ່ານ ປອ. ແກ້ວອຸດອນ ບຸດສິງຂອນ, ຮອງເຈົ້າແຂວງ ຄໍາມວນ, ມີຫົວໜ້າຫ້ອງການ, ຫົວໜ້າອົງການດັດສົມໂທລະຄົມມະນາຄົມ, ຮອງຫົວໜ້າສູນບໍລິຫານລັດດິຈິຕອນ ຈາກກະຊວງເຕັກໂນໂລຊີ ແລະ ການສື່ສານ, ມີຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ ແລະ ພະແນກການທີ່ກ່ຽວຂ້ອງເຂົ້າຮ່ວມຕິດຕາມ.

ໃຫ້ການຕ້ອນຮັບຄະນະໃນຄັ້ງນີ້ ໂດຍ ທ່ານ ຈູ່ ຊຽງ ລີ້, ຮອງຜູ້ອໍານວຍການ ບໍລິສັດ ຊີໂນ-ອາກຣີ ໂປຕາສ ຈໍາກັດ. ໃນວາລະການຕ້ອນຮັບ ທ່ານ ລັດຖະມົນຕີ ໄດ້ຮັບຊົມວີດີໂອກ່ຽວກັບສະພາບໂດຍລວມຂອງບໍລິສັດ, ຮັບຟັງການລາຍງານໂດຍຫຍໍ້ຄວາມເປັນມາການຈັດຕັ້ງປະຕິບັດວຽກງານ ແລະ ແຜນພັດທະນາການດໍາເນີນທຸລະກິດໃນໄລຍະຜ່ານມາ, ການກໍ່ສ້າງເຂດນິຄົມອຸດສາຫະກໍາໝູນວຽນອັດສະລິຍະ, ຄວາມຄືບໜ້າໂຄງການຝຸ່ນໂປຕາສ ລວມເຖິງການມອບພັນທະຕ່າງໆໃຫ້ລັດຖະບານ ແລະ ການປະກອບສ່ວນທາງສັງຄົມ, ການຊຸກຍູ້ສ້າງວຽກເຮັດງານທໍາແກ່ທ້ອງຖິ່ນ ແລະ ອື່ນໆ. ອີງຕາມການລາຍງານໃຫ້ຮູ້ວ່າ: ພາຍຫຼັງບໍລິສັດໄດ້ເລີ່ມຜະລິດທົດລອງ ແລະ ກາຍເປັນໂຄງການເກືອໂປຕາສລະດັບ 1 ລ້ານໂຕນ ທຳອິດໃນຂົງເຂດໃໝ່ຂອງການຜະລິດເກືອໂປຕາສໃນໂລກ. ຜະລິດຕະພັນເກືອໂປຕາສຂອງບໍລິສັດ ຊີໂນ-ອາກຣີ ໂປຕາສ ແມ່ນໄດ້ສົ່ງອອກຈໍາໜ່າຍໃນຫລາຍປະເທດ ເຊັ່ນ: ຈີນ, ຫວຽດນາມ, ໄທ, ອິນໂດເນເຊຍ, ມາເລເຊຍ, ອິນເດຍ, ນິວຊີແລນ ແລະ ຍີ່ປຸ່ນ ຊຶ່ງໄດ້ພົ້ນເດັ່ນໃນຕະຫຼາດສາກົນ ໂດຍສະເພາະແມ່ນຕະຫຼາດເອເຊຍຕາເວັນອອກສ່ຽງໃຕ້. ປັດຈຸບັນ ກຳລັງການຜະລິດແມ່ນບັນລຸ 3 ລ້ານໂຕນຕໍ່ປີ, ໃນປີ 2025 ຈະບັນລຸ 5 ລ້ານໂຕນຕໍ່ປີ ແລະ ອະນາຄົດຈະບັນລຸ 7-10 ລ້ານໂຕນຕໍ່ປີ ເພື່ອຕອບສະໜອງການບໍລິການຜະລິດຕະພັນທີ່ມີຄຸນນະພາບສູງໃຫ້ແກ່ອາຊີ ແລະ ທົ່ວໂລກ. ຂະນະດຽວກັນ ຍັງໄດ້ຊຸກຍູ້ການສ້າງວຽກເຮັດງານທຳ ໃຫ້ແກ່ທ້ອງຖິ່ນ, ບໍລິສັດຍັງໄດ້ຈັດຕັ້ງດຳເນີນຫຼາກຫຼາຍກິດຈະກຳ ວິສາຫະກິດ ເພື່ອເສີມສ້າງທີມງານທີ່ສາມັກຄີກົມກຽວ ເພື່ອພ້ອມກັນພະຍາຍາມສູ້ຊົນໃຫ້ບັນລຸຄາດໝາຍ ໂຄງການປອດໄພ, ສີຂຽວ, ເປັນມິດກັບສິ່ງແວດລ້ອມ ແລະ ພັດທະນາຍືນຍົງ. ນອກນີ້ ໃນເຂດດັ່ງກ່າວ, ຍັງຈະໄດ້ສ້າງເປັນນິຄົມອຸດສາຫະກຳໝູນວຽນ ອັດສະລິຍະ ອາຊີ ໂປຕາສ ສາກົນ ໂດຍຈະແບ່ງອອກເປັນ 3 ພາກສ່ວນໃຫຍ່ ຄື: ສວນອຸດສາຫະກຳໂປຕາສ, ສວນອຸດສາຫະກຳອະໂປຕາສ ແລະ ເມືອງອັດສະລິຍະ, ມີເນື້ອທີ່ລວມປະມານ 2.000 ເຮັກຕາ, ຄາດຄະເນການລົງທຶນທັງໝົດຫຼາຍກວ່າ 4 ຕື້ໂດລາສະຫະລັດ.

ໂອກາດດັ່ງກ່າວ, ທ່ານ ລັດຖະມົນຕີ ກຕສ ໄດ້ສະແດງຄວາມຊົມເຊີຍ ແລະ ຕີລາຄາສູງ ການຈັດຕັ້ງປະຕິບັດໂຄງການໃນໄລຍະຜ່ານມາ ຊຶ່ງໄດ້ມີຄໍາເຫັນ 04 ຈຸດ ເປັນຕົ້ນແມ່ນ 1) ດ້ານເຕັກໂນໂລຊີ: ບໍລິສັດ ໄດ້ນໍາໃຊ້ເຕັກໂນໂລຊີທີ່ທັນສະໄໝເຂົ້າໃນຂະບວນການຜະລິດ, ໃນເຂດພັດທະນາຂອງບໍລິສັດກໍຍັງມີເຂດຕົວເມືອງອັດສະລິຍະທີ່ມີການນໍາໃຊ້ເຄື່ອງມືເຕັກໂນໂລຊີອັດສະລິຍະ ເຊັ່ນ: ການນໍາໃຊ້ປັນຍາປະດິດ (AI) ເຂົ້າໃນວຽກງານຄຸ້ມຄອງພະນັກງານ, ລະບົບກ້ອງວົງຈອນປິດ, ລະບົບຮັກສາຄວາມປອດໄພ ແລະ ທ່ານໄດ້ມີຄໍາເຫັນໃຫ້ບໍລິສັດສ້າງເປັນອຸດສາຫະກໍາອັດສະລິຍະແຫ່ງທໍາອິດໃນ ສປປ ລາວ ເພື່ອໃຫ້ບໍລິສັດອື່ນໆເອົາເປັນແບບຢ່າງ ແລະ ມາຖອດຖອນບົດຮຽນນໍາ; 2) ດ້ານການສິ່ງແວດລ້ອມ: ແມ່ນໃຫ້ໄປຕາມທິດທາງ ກໍຄື ແນວທາງນະໂຍບາຍຂອງພັກ ແລະ ລັດຖະບານ ໂດຍສະເພາະແມ່ນໃຫ້ຄຽງຄູ່ກັບການພັດທະນາແບບຍືນຍົງ ເປັນມິດກັບສິ່ງແວດລ້ອມ, ເປັນຕົ້ນແມ່ນ ສະພາບແວດລ້ອມ, ອາກາດ, ການຟື້ນຟູສິ່ງແວດລ້ອມ, ການຮັບປະກັນບໍ່ໃຫ້ເກີດອຸປະຕິເຫດພາຍຫຼັງຂຸດຄົ້ນສໍາເລັດ; 3) ດ້ານແຮງງານ: ປັດຈຸບັນ ສປປ ລາວ ກໍາລັງພົບບັນຫາແຮງງານຫຼັ່ງໄຫຼ່ໄປເຮັດວຽກຢູ່ຕ່າງປະເທດ ຖ້າພວກເຮົາສ້າງເງື່ອນໄຂເອື້ອອໍານວຍທີ່ດີ ເປັນຕົ້ນແມ່ນ ຫ້ອງພັກສໍາລັບພະນັກງານ, ສ້າງຊີວິດການເປັນຢູ່ທີ່ດີ, ຄ່າຕອບແທນທີ່ດີ ກໍຈະສາມາດດຶງດູດແຮງງານເຂົ້າມາເຮັດວຽກຢູ່ບໍລິສັດ ແລະ ຫຼຸດຜ່ອນການອອກໄປຂາຍແຮງງານຢູ່ຕ່າງປະເທດ ຊຶ່ງເປັນການປະກອບສ່ວນຢ່າງໃຫຍ່ຫຼວງທີ່ສຸດຕໍ່ ສປປ ລາວ; ດ້ານການສຶກສາ: ເຫັນໄດ້ວ່າທາງບໍລິສັດແມ່ນຍັງຂາດພະນັກງານທາງດ້ານໄອທີ ຊຶ່ງກະຊວງເຕັກໂນໂລຊີ ແລະ ການສື່ສານ ກໍມີ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ຊຶ່ງເປັນສະຖາບັນທີ່ກໍສ້າງບຸກຄະລາກອນທາງດ້ານໄອທີ ແລະ ສາມາດຕອບສະໜອງແຮງງານໄອທີໃຫ້ແກ່ບໍລິສັດ ພ້ອມນັ້ນ ກໍສະເໜີໃຫ້ບໍລິສັດໃຫ້ການສະໜັບສະໜູນທຶນການສຶກສາໃຫ້ແກ່ນັກສຶກສາພາຍໃນແຂວງໄດ້ໄປສຶກສາ ເພື່ອຈະກັບມາເປັນບຸກຄະລາກອນໄອທີຂອງບໍລິສັດ.

:

ໃນໂອກາດນີ້, ທ່ານລັດຖະມົນຕີ ພ້ອມດ້ວຍຄະນະ ຍັງໄດ້ຢ້ຽມຊົມສະຖານທີ່ການຜະລິດຕົວຈິງຂອງບໍລິສັດອີກດ້ວຍ.