ໃນຕອນເຊົ້າ ວັນທີ 11 ສິງຫາ 2022 ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC) ຫຼັກ 5, ນະຄອນຫຼວງວຽງຈັນ. ສະຫາຍ ນາງ ຍອດ ໄຊທົງເດດ ຮອງປະທານ ສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ນໍາພາ ເອື້ອຍນ້ອງຍິງ ເຂົ້າຮ່ວມກອງປະຊຸມ ສໍາມະນາ ຫົວຂໍ້: ການນໍາໃຊ້ເຕັກໂນໂລຊີ ກັບການຄ້າມະນຸດ ເພື່ອລະນຶກວັນສາກົນ ຕ້ານການຄ້າມະນຸດ 30 ກໍລະກົດ ປະຈໍາປີ 2022 ເປັນປະທານ ໂດຍ ທ່ານ ນາງ ປອ. ອິນລາວັນ ແກ້ວບຸນພັນ, ກໍາມະການສູນກາງພັກ, ປະທານ ສູນກາງສະຫະພັນແມ່ຍິງລາວ.

       ຜູ້ເຂົ້າຮ່ວມທັງໝົດ ໄດ້ຮັບຟັງ ການນໍາສະເໜີຂອງນັກວິທະຍາກອນຈາກພາກສ່ວນກ່ຽວຂ້ອງ ກ່ຽວກັບການນໍາໃຊ້ເຕັກໂນໂລຊີ ທີ່ຕິດພັນກັບພາລະບົດບາດ ການຕ້ານ ແລະ ສະກັດກັ້ນ ການຄ້າມະນຸດ ຂອງ ກະຊວງປ້ອງກັນຄວາມສະຫງົບ, ກະຊວງເຕັກໂນໂລຊີ ແລະ ການສື່ສານ ແລະ ຜູ້ຮັບຜິດຊອບ ແຜນງານ ອາຊຽນ-ອົດສະຕາລີ ຕ້ານ ແລະ ສະກັດກັ້ນ ການຄ້າມະນຸດ.